Um okkur

Snorri er fæddur og uppalinn í Reykjavík. Hann lærði klassískan söng bæði á Íslandi og í Vínarborg, þar sem hann lauk diplómanámi í óperusöng. Í kjölfarið starfaði hann um árabil sem óperusöngvari víða í Evrópu, einkum í Þýskalandi og Austurríki.

Þrátt fyrir ástríðu fyrir tónlistinni hefur Snorri alla tíð átt djúpa tengingu við náttúruna. Þegar gosið í Eyjafjallajökli hófst árið 2010 ákvað hann að fylgja hjartanu og sneri sér alfarið að leiðsögn. Hann hefur síðan þá unnið við einkaleiðsögn og sérsniðnar ferðir um Ísland, þar sem hann nýtir þekkingu sína á landi og sögu til að skapa persónulegar og innihaldsríkar upplifanir fyrir gesti.

Snorri talar íslensku, ensku og þýsku og er þekktur fyrir rólega nærveru, frábæra frásagnargáfu og næmt auga fyrir jafnvægi milli náttúru, kyrrðar og mannlegra tengsla. 

Líkt og Klara tekur Snorri einnig þátt í ferðalögum Freyja Travel á erlendri grundu, þar sem áherslan er á lýðheilsu, menningu og náttúru – og upplifanir sem næra bæði líkama og sál.

Klara er fædd í Vestmannaeyjum og uppalin í Hafnarfirði. Hún er menntaður kennari með B.Ed. gráðu og starfaði um árabil sem stærðfræði- og náttúrufræðikennari áður en ástríðan fyrir ferðalögum og útivist tók völdin.

Hún hefur starfað sem skíðakennari í Ölpunum, stundað nám í Þýskalandi og hjólað um Andesfjöllin í Suður-Ameríku – og er reiprennandi í íslensku, ensku og þýsku, auk þess að kunna sitthvað í Pinzgauerisch, litríkri austurrískri mállýsku.

Klara hefur leiðsagt frá árinu 1998, bæði á Íslandi og erlendis. Síðustu ár hefur hún sérhæft sig í einkaleiðsögn og ævintýraferðum utan alfaraleiða, þar sem hún nýtir sína víðtæku reynslu og persónulegu nálgun til að skapa einstakar upplifanir.

Hún skipuleggur og leiðir einnig göngu-, hjóla- og skíðaferðir til Austurríkis, auk endurmenntunarferða kennara, þar sem náttúra, menning og faglegt nám fléttast saman í eina heild.
Rauði þráðurinn í allri hennar vinnu er lýðheilsa og vellíðan – að ferðalagið styrki bæði líkama og sál, og skilji eftir sig góðar minningar og dýpri tengingu við náttúruna.

Ekki eru það alltaf bara menn sem fara í ferðalag með Freyju Travel – stundum slæst með okkar ástsæli félagi, Sólon. Hann er hvítur og loðinn siberian samoyed, rúmlega sex ára gamall, og ávallt í góðu skapi.

Sólon er eflaust einn af ferðamestu hundum Íslands – hann hefur ferðast um fjöll og firnindi með gestum okkar og heillar hvern þann sem hann hittir. Hann hefur líka starfað sem skólahundur í nokkra vetur, þar sem rólegt og blítt eðli hans hefur glatt börn og fullorðna eins.

Í ferðum okkar er hann hinn rólegasti félagi, alltaf ánægður með sitt hlutskipti og virðist njóta þess jafnmikið og við að vera úti í íslenskri náttúru. Ekki þarf að spyrja að því hver fær mesta athyglina þegar Sólon mætir í ferð – hann stelur hjörtum allra á svipstundu.